CCB Jungi Garde

CCB Jungi Garde

Übersicht

Fasnacht
Fasnacht 2019
Fasnacht 2018
Fasnacht 2017
Fasnacht 2016
Fasnacht 2015
Fasnacht 2014
Fasnacht 2013

CCB Central Club Basel
• Stammverein 1911
• Junge Garde 1934
• Alte Garde 1964

www.ccb1911.ch

Willkommen
INDEX
CCB Jungi Garde



Fasnacht 2019 - CCB Jungi Garde
Sujet: 40 Joor und allewyl no roti Hoor


Fasnacht 2019
Basler Fasnachtsclique Jungi Garde



CCB - Jungi Garde 1934

Sujet: 40 Joor und allewyl no roti Hoor


Garfield, Happy Cat Celebration Börsday!

Die Story, die duen ich euch bstimmt gärn verzelle.
Drzue e baar Fakte, die mien zerscht ins Helle.
Mr göön drum bitz zrugg in dr Zyt e baar Joor
und landen im Weschte - s isch fascht nümme wohr -
do hänn e baar Amis im Joor Nüünesächzig
e Plan uff Papier brocht, wo gar nit so schlächt syg.
Doch glii scho druff aabe gits erschti Problem
Si sinn sich nit ainig zur Faarb vom Emblem.

"Cat in the Moon - Space Mission Six-Nine"
So stoots blau uff wyss, doch das glaubt ys e Kain!

Drum ischs halt esoo, dass me anderi Gschichte
vom Flug uff e Mond hüt dr Menschhait duet brichte.
Und drum het me laider au völlig vergässe:
Im Ruumschiff do isch no e Kater drin gsässe!
Dr Kater ischs Huustier im Mond gsi vom Maa,
wo druff kuum si Friede me gfunde het ghaa.

Wenn mee wottsch zum Mond und dr Landig erfaare,
denn sottsch dir dr Zeedel vom Stamm nit erspaare.
Mir Junge mir maine, die Gschicht syg nit schlächt,
dr Stamm vo uns glaubt dra, drum isch ys das rächt.
Obs stimmt oder nit, isch gar nit soo wichtig,
denn unseri Gschicht goot nit in die Richtig...

Dr Kater vom Mond, het die Fähri verloo
und scho isch är wägg gsi, isch uff und drvoo!
Fake News hör ich Ainigi zwüschedrii schreie.
Doch glaub mr, kai Grund gits, scho jetz duure z gheie.

Fake News?! No ganz kurz, doo drzue möcht ich saage:
Bi uns stimmt die Story, bim Stamm sottsch go klaage!
Dr Kater vom Mond - wie gsait - dää isch verschwunde,
das weiss ich vo Dritte, me het ihn nümm gfunde!

So rund zää Joor spööter, do findet me denne,
e Glai-Tier mit Tätzli uff Pizzas am Penne.
Im Mama Leonis do frisst är sich sätter
und wird mit Lasagnes e jede Daag fetter.
E Root-Tiger-Kater mit Kurzhoor Frisur,
e orange Späggkloss mit Straiffe-Figur!
Isch frech, fett und fuul und e Spur filosoofisch,
was in däre Zyt überhaupt nit so doof isch!

Geburtsdaag am Määntig, im Juni geboore
und trotzdäm kai Ghör für das Fescht uff de Ohre.
Will Määntig sinn schwierig, die Dääg duet är hasse,
drfür liebt är Wiehnacht, dä Daag duet ihm passe.

Em Garfield si Albtraum-Verhalte isch kritisch,
psychisch bedängglig, doch bstimmt nit politisch!
In sinere Kischte und unter dr Decki -
uffmerggsam wach, bliibt dr Schloof uff dr Strecki.




"So You are mis 40-Joor Nightmare hüt Znacht?"
"Oh Yes Sir! E Wääie zum Faschte, wo wacht!"

Und d Glogge schloot vieri, am Määntig demoorge,
so macht denn dr Määntig ihm grad no mee Soorge.
Am Morgestraich stoot no die Stadt zerscht ganz still,
das macht aim scho Angscht, wenn me doo nit sii will!
Är tröimt denn si Albtraum, sehts Ändi scho koo,
doch Schreck, das isch falsch, denn e Ueli stoot doo!
E Waggis zieht d Schleegel uff, haut si uff d Drummle,
zwai Pierrots, die starte in d Gässli go Bummle,
e Huffe vo Piccolo töne ganz schrill...
Ich sags, dasch dr Horror, wenn Ain das nit will!

Die Stadt isch ganz dunggel, nur Handys dien blitze
und schwach lüchte Lämpli, uff Köpf dien si sitze.
Die Köpf sinn nit menschligg, die Gsichter verzerrt,
wenn Ain das nit kennt, schiint die Wält sehr verkehrt!
E Mählsuppe losst sich im Topf ummeriehre,
e Gschmack, wo Aim wenigschtens bitz könnt verfiehre.
In dääre Stadt schmeggt au dr Truubesaft suur,
e Ziibele-Wääie liggt fräch uff dr Luur...

E Ziibele-Wääie? Das kaa doch nit sii!
Geburtsdaags-Lasagne, do wär är drbii.
Die Fascht-e Wääie, wo gwacht het zur Nacht,
isch plötzligg verschwunde, verliert ihri Macht.
Dr Garfield stoot uff, goot in d Kuchi, wott ässe.
Si Albtraum isch wägg, dä isch ganz schnäll vergässe.

Au Gschängg muess dr Garfield bestimmt nit lang sueche.
S git Mählsuppe-Wääie-Lasagne-Kueche!


CCB Jungi Garde Fasnacht 2019 Ladäärne

CCB Jungi Garde Fasnacht 2019 Ladäärne

CCB Jungi Garde Fasnacht 2019 Vordrab

CCB Jungi Garde Fasnacht 2019 Pfyffer

CCB Jungi Garde Fasnacht 2019 Damboure


Keine Einträge