CCB Jungi Garde

CCB Jungi Garde

Übersicht

Fasnacht
Fasnacht 2017
Fasnacht 2016
Fasnacht 2015
Fasnacht 2014
Fasnacht 2013

CCB Central Club Basel
• Stammverein 1911
• Junge Garde 1934
• Alte Garde 1964

www.ccb1911.ch

Fasnacht 2016
FASNACHT
Fasnacht Jungi Garde 2016 - Zeedel und Fotos



Fasnacht 2016 - CCB Jungi Garde
Sujet: So aifach.


Fasnacht 2016
Basler Fasnachtsclique Jungi Garde



CCB - Jungi Garde 1934
Central Change Büro

Sujet:So aifach.
 
 

Uss dr Orange machsch ganz eifach Salz
und däre Firma im Ziircherland gfallts..!
Doch jetz pass uff und loos guet zue,
MIR hänn e Lischte, die loot uns kai Rueh!

DRUM: Härzlig willkomme bim CCB,
em Central Change Büro - Abteilig D.
Mir schaffe für Basel, für d Schwiiz und für d Wält.
Mir ändere alles, Hauptsach s git Gäld!

Gib UNS e Name, e Stadt oder Stroos...
Mir löön denn grad unseri Zwärgli druff loos.
Die schwinge der Löffel und riehre die Suppe
und bilde uss Wörter ganz neui Gruppe.

Uss Orantsch wird Salt, das isch jo kai Sach,
das finde mir nämlig eher rächt schwach.
Es gäbt zu däm Thema doch Einiges meh,
wo MIR als Änderig no gärn wurde seh.

Drum do unsri Lischte vo wichtige Sache,
wo mir denn als näggschts no zämme wänn mache:

s Chrütterhüüsli, daas schiint klaar -
wird Aromat - s isch ganz wunderbaar!

s Basler Top Secret Corps bruucht no meh Biss
und heisst ab jetz Drumstreet Boys oder Take This!

Uff em Computer wird Öpfel zu Biire -
und Fänschter zu Türe - würd DICH das verwiire?

Dr Friehlig heisst Summer, daas isch jetz kei Witz,
bi uns in Basel findsch denn die gross Hitz.

S Tiefbauamt ändre, wirft grad no bitz Staub!
DIE bohre und pickle mich Tag für Tag taub.

Swisscom und TCS dien mir verbinde,
denn mache SIE Panne zum schnäll überwinde!

D Basler Zittig - daas isch no in Plaanig -
was doo druss entstoot, do hänn mir kai Ahnig!
Au anderi Firme uss unsrer Stadt,
die wurde mir ändere, das wär doch sauglatt!

Und apropos Planig - Politiker dien,
d Näme nie ändre - au wenn sie das mien.
Konkret gäbts do grad no baar Ändrige z mache,
will DIE mache Sache, s isch gar nit zum Lache;-(

Dr FCB z ändere daas wär nit richtig,
DIE kennt me z Europa, das isch uns rächt wichtig!
Dr Trainer vo Ziiri, dä kasch au grad loo,
dää isch jo scho rächt, das isch halt eso!

s Wort Räppli dien usswärtigi Bsuecher nit kenne,
"Spassflogge" dien mir s drum lang scho benenne.
Mimösli, Dääfi, Orange - uns gfallts -
zimmlig drnäbe liggsch DU doo mit Salz!

Zum Fasnachts-Comité saage mir nüt,
DIE gänn uns bitz Gäld, daas sinn gueti Lüt!
Mir schaffe für Gäld, drum meine mir doo:
no mee vo däm Gäld, das hätte mir gnoo!

DRUM: Härzlig willkomme bim CCB,
em Central Change Büro - Abteilig D.
Mir ändere alles, obs wottsch oder nit!
Gäld drfür wänn mir, egal wieviels git...

Und Daag und Nacht sinn unseri Zwärgli
im Büro am Schaffe an all däne Bärgli,
wo anderi Lüt uns vor d Tüüre stelle
und MIR nit wirgligg hänn ändere welle!

Sinn MIR mol ganz ehrlig, wäär bruucht das scho?
Wäär bruucht e Firma, wo aifach eso -
dr Name duet ändere - ob neu oder alt -
Hauptsach anderscht, wies aim grad gfallt?!

MIR finde, das isch vo Grund uff drnääbe,
aber was wottsch? Me kaa drvo lääbe,
wenn mir e Arbet fir SIE dien rächne,
denn bruuche mr sälte meh, als e mieds Lächle.

DRUM: Härzlig willkomme bim CCB,
em Central Change Büro - Abteilig D.
Mir schaffe für Basel, für d Schwiiz und für d Wält
mir ändere alles, Hauptsach s git Gäld!

MIR mache das besser als IRGENDEIN sunscht,
e Name z ändere isch schliesslig e Kunscht!!!
Drum gib au DU uns näggscht mol di Gäld
und KEINE erkennt dich denn no uff dr Wält!

Aber UNS findsch immer - als CCB
DÄÄ Name dää blibbt, kaine bruucht mee!!!


CCB Jungi Garde Fasnacht 2016 Ladäärne

CCB Jungi Garde Fasnacht 2016 Ladäärne

CCB Jungi Garde Fasnacht 2016 Vordrab

CCB Jungi Garde Fasnacht 2016 Pfyffer

CCB Jungi Garde Fasnacht 2016 Damboure


Keine Einträge