CCB Jungi Garde

CCB Jungi Garde

Übersicht

Fasnacht
Fasnacht 2016
Fasnacht 2015
Fasnacht 2014
Fasnacht 2013

CCB Central Club Basel
• Stammverein 1911
• Junge Garde 1934
• Alte Garde 1964

www.ccb1911.ch

Fasnacht 2015
FASNACHT
Fasnacht Jungi Garde 2015 - Zeedel und Fotos



Fasnacht 2015 - CCB Jungi Garde
Sujet: S Selfie-Glöggli lüttet scho!


Fasnacht 2015
Basler Fasnachtsclique Jungi Garde



S Selfie-Glöggli lüttet scho!
 
 


D Gschicht vom Selfie

Es isch e mol gsii vor ganz langer Zyt, ass en Affe-Familie in iirer Hööli um e Füürstell gsässen isch. Si hänn s Füür aagluegt und drüber noochedänggt, wie das Füür vor dausige vo Joore entdeggt worden isch. Doo säit äine vo de Gläine: “En Aff, dä entzündet e Füür uff dr Stell – und grillt no schnäll si Mammut vom Bell”. En andere duet mit Koole zmittst uff d Wand vo dr Hööli moole. Doo säit dr Babbe: “Au d Höölemensche dien Selfies mit Koole – ooni Strom uff d Hööliwänd moole”.

Mit dr Entdeggig vom Füür het s au Koole gää und doodrmit isch s Uur-Selfie als Höölemoolerei erfunde gsii. Au d Freud an dr Sälbschtdarstellig isch grad gliichzytig drmit erfunde worde, well äine vo däänen Affe d Bemergig het gheie loo: “S Mammut isch das Joor in dr Uurzyt dr Renner – mit Füür isch es wermer, und s hebt au no lenger!” Är het bim laabere vo däm Satz sich sälber mit Koole schnäll vor em Mammut am Spiess uff d Felswand zäichnet. Spööter het är denn bim Versände vo sim erschte Uur-Selfie zimmlig erstuunt feschtgstellt, ass es no e gläins Problem git: “E Selfie uff dr Höölewand – isch weniger praggtisch, wie äins in dr Hand!”

Wyter gangen isch d Gschicht vom Selfie denn vyl spööter mit dr Erfindig vom Papyrus. “Uff Papyrus, do seesch egyptischi Affe, wo sytlig über d Schultere gaffe!” Und mit dr Erfindig vom erschte Kaländer vor säggsdausig Joor: “E Kaländer zem Zäige vo Dääg kunnt grad rächt – dääglig e Selfie, das isch gar nit schlächt.”

Im Mittelalter hänn denn vor allem d Ritter mit Selfies um sich gschosse, aber: “In Ritterrüschtig isch s no schwiirig – e Selfie z schiesse, wäge dr Schmiirig!” Wäärend däm hänn uff dr andere Syte vom grosse Däich zue genau dr glyyche Zyt anderi mee Erfolg gha: “E Indianer het ganz unverdrosse, mit Pfyyl und Booge e Selfie gschosse.” Dr näggschti grossi Schritt in dr Gschicht vom Selfie isch denn mit dr Erfindig vom Buechdrugg Realideet worde: “Zue Zyte vom Buechdrugg, do schaffe pro Selfie – siibe Zäichner vo säggsi bis elfi.” S Brobleem vom Versände vo de Selfies het men erscht vyl spööter ab em nüünzäänte Joorhundert versuecht z lööse. Zerscht mit Briefduube, aber das isch nonig dr Hammer gsii: “Mit Briefduube kasch käini Selfies versände – die könne bim Sände zmittst drin no wände.” Und au Kutsche sinn käi gueti Löösig gsii: “Rächt schwär fallt au s Sände mit Ross und Kutsche, wenn d Selfies bim Traabe zer Kutsche ussrutsche.” Sälbscht die schlauschte Köpf sinn zue dääre Zyt nit wirglig wyterkoo bim Versände vo Selfies, aber wenigschtens d Fotografie het denn grossi Fortschritt gmacht: “Dr Einstein macht no relativ – gueti Selfies mit Stativ!”

Dr ändgültig Erfolg vom Selfie isch denn mit dr Erfindig vom Händy koo, was aber erscht in de letschte Joore wirglig zem grosse Durchbruch gfiert het: “Mit em Händy ka me Selfies mache, Delifoniere, ‘Game’, Kueche bache...” Und so het sich denn dr Gräis gschlosse, wo denn dää Aff uss em fäärnen Indonesie uns Mensche vor Kurzem mit sim Händy zäigt het, wie me Conschtant Cooli Selfie-Bildli macht.

“Ha au e Selfie welle mache
und es het e Bildli gää
Ych ha s denne uff mi Händy
als Profil-Bild welle nää
aber s Händy isch nit aa
gsii, jetzt isch käi Bildli doo
und drum wäiss jetzt käine, was ych
doo jetzt dängg dervoo!...“



Zem Schluss git s für alli Selfie-Fotografe, wo noonig so vyl Erfaarig hänn wie dää Aff uss Indonesie, vo uns Junge no e baar Tipps: “Seesch uff em Selfie e roote Punggt – hesch du d Maasere, het s mi dunggt”, “Es git Lüt, die wärde muff – hesch uff em Selfie iir Gsicht nit druff”, “Käi Selfie wird zem Megaflop – dangg däm tolle Photoshop”. Und no e spezielle Tipp für alli Erwaggsene: “Die beschte Selfie, die git s ab den Elfi! (Das kunnt bi dääne mäischtens drvoo, was si am Oobe so zue sich hänn gnoo;-)”. Und e Binggis mäint ganz am Rand: “Im Selhfii isch e hiz – do git s doch grad e bliz” – Und soo git s zue däm Thema bestimmt käini Frooge me. Und wenn doch, denn goosch äifach uff unseri Website und luegsch au unseri räschtlige Värsli aa...


CCB Jungi Garde Fasnacht 2015 Ladäärne

CCB Jungi Garde Fasnacht 2015 Ladäärne

CCB Jungi Garde Fasnacht 2015 Vordrab

CCB Jungi Garde Fasnacht 2015 Pfyffer

CCB Jungi Garde Fasnacht 2015 Damboure


Unseri Värsli, wo mir fürs Gluggerli und der Zeedel gschriebe hänn...

Im Selhfii isch e hiz
do gits doch grad e bliz

Dr Lällekönig isch old school
Numme Duckfaces sin jetz cool

Dini Ziiblewaie kasch nur gniesse
wenn e Föteli drvoo duesch schiesse

E Indianer hett unverdrosse
mit Pfyyl und Booge e Selfie gschosse

E Affestamm uff Sumatra
hett als erschts e Handy gha

D Affe klaue - s isch e Schand
s Handy ungfrogt uss dr Hand

Dä Viireschutz, dr Affee-Mac
Butzt ständig alli Selfies wägg

D Oma hett uff der Hundertscht e Handy bekoo
bis sie das checked isch sie gar nümme doo

Im Zug, im Tram, im Bus
s Siri kunnt bestimmt immer druss

Mit em Handy gang ich nit ufs Velo
dört spiil ich lieber mit em Cello

Dütsch und Mathe wotti nit
doch mini Selfiesammlig isch dr Hit

Blibt di Härz stoh ischs nid schlimm
mir hän dr Defi im Handy drinn

E Fotikamera isch uncool
hüt gits scho Handys für in Pool

Fötele während em Buggy fahre
das mache numme grossi Barbare

Kai Selfie wird zum Megaflopp
dangg däm tolle Fotishop

Die beschte Selfie
gits ab de Elfi!

Dr Mustafa dää macht e Selfie au
doch gsehsch nummme ihn und nid sini Frau

Do it your Selfie!

E Selfie isch dr letschti Furz
aber mi Arm isch drfür aifach z kurz

Ich mach kai Selfie jo persee
Ich will mi doch nid sälber gseh

Mach au du mit – s isch dr Hit
suscht bisch out und nümme drbii
und das kas bim beschte Wille nid sii

Selfie dört, Selfie doo
sisch fatal, kas nid jede verstoo

A Selfie a day - keeps the doctor away!

Oh bin ich e arme Dropf
uff mim Selfie fählt dr Kopf

Selfie hii, Selfie häär
aimol drugge isch nid schwäär

Es git Lüt die wärde muff
hesch uf em Selfie ihr Gsicht nid druff

Mach im lätze Momänt e Cligg
schaffschs uff d Titelsitte vom Bligg

Es sait der Blocher zum Schweri
Lieber es Selfie als e Geri!

Im Bundeshuus wird nüt beschlosse
es wärde numme no Selfies gschosse

In Ritterrüschtig isch es no schwiirig
e Selfie z schiesse, wäg dr Schmiirig

Duesch Luft ins Handy iine pumpe
kasch trotzdäm drmit nit umme gumpe

Wenns emol e Biire butzt
wüsse mr nit ob e Selfie nutzt

Muesch numme uff e Drugggnopf drugge
so ka jede sii Kopf ussdrugge

E Radargrät das isch sauglatt
do kriegsch e Selfie mit Zifferblatt

Dr Einstein macht no relativ
gueti Selfies mit Stativ

Au d Vitamin sinn hütte scho
Als Äppel App umsunscht z bekoo

Schaltet d Ample vo rot uf gääl
längts grad no für e Selfie schnäll

Uff dr Autobahn ischs zimlig schissig
e Selfie z schiesse bi 130

Machsch e Selfie bim EEG
jagts dr Wärt ins Nienemeh

Syt hütte kasch dangg Farbfärnseh
dini Bildli in Farbe gseh

Hütte zahlsch mit Kreditkarte
spöter mit Handy mir warte

E Selfie schiesse goht sogar
hesch e Akku mit Solar

Sehsch uff em Selfie e rote Punggt
hesch du d Masere hetts mi dunggt

Mit Handys ka me Selfies mache
telefoniere, game, Kueche bache

Wenn e Aff am PC sitzt
könnts no sii dass es plötzlig blitzt

Wenn de öbbis wöttsch verbiege
nimms IPhone 6 - das sott dr gniege


Keine Einträge